14 Apr 2025

 Kgosi Ditshwanelo Makwati wa kgotla ya Teko kwa Serowe a re seemo sa ditsela tsa masimo a Mogatsapoo ga se itumedise.

O buile se mo phuthegong ya kgotla e e neng e buisiwa ke mopalamente wa Serowe Borwa, Rre Leepetswe Lesedi bosheng. Kgosi Makwati a re ditsela tse di yang masimong a Mogatsapoo le Tshetlong le metshela kgabo di senyegile mo go dirang gore mesepele ya go ya masimong e nne bokete. O kopile puso go tsibogela seemo se, ka ba beile matshelo a bone kwa masimo.

E rile a lekodisa mopalamente, mothusa modulasetilo wa komiti ya ditlhabololo tsa motse  ya Lontone, Rre Tshepo Moloi a re e le  komiti ba kgonne  go baakanya matlo a a bapileng le sekole se se potlana sa Tshekedi, ba a tsenya le dithibela magodu gore banni ba nne ka tshosologo. Rre Moloi o supile gape gore ba kgonne  go tsenya dithibela magodu kwa ntlo-lehalahala ya bone.

 A re ba ile ba kgona go baakanya  sekole sa bananyana se se bapileng le sekole sa Tshekedi, ebile yo o se dirisang a ile a kgona go fiwa teseletso. Rre Moloi o ile a supa gore le bone e le komiti ba na le matshwenyego a ba kopanang le one mo kgaolong, a supa fa sekole sa Tshekedi  se le makgasa, go sena ditilo le fa e le  ditafole.  A re khansele  e kgobokanya makgasa ao mo sekoleng mme se, se baya matshelo a bana mo diphatseng.

E rile a ba kgwa kgaba, mopalamente Lesedi a supa fa diemo tsa ditsela tsa kwa masimong di sa dirwa mathata e le gore diemo tsa dipula di diragetse ngwaga wa puso wa madi o le gaufi le go  fela. Mopalamente  Lesedi  o ile a kopa  khansele go  tsaya paakanyo ya dikole ka tlhoafalo.  

A re puso e tsenye mo di tumalanong le ba khampani ya motlakase kwa Aforika Borwa gore ba ba rekisetse motlakase mme ba dumalana, ke ka seo mo malatsing a a fetileng motlakase o ne o sa kgaoge. Rre Lesedi o ne a kopa bagodi go tshwara madi a bone sentle, ebile ba itshireletse mo magotswaneng a a tletseng gongwe le gongwe. A re go botoka ba dira thulaganyo ya go amogelela kwa bankeng go na le go a tsaya otlhe kwa posong. BOKHUTLO