10 Apr 2025

Kgosi Mmirwa Malema wa Babirwa o tlaa bolokwa ka Matlhatso. O tlhokafetse Moranang a rogwa a na le dingwaga tse di masome a a robang bongwe le bone, a bonwe Phatwe a tlhola ga bedi ka 1930.

Kgosi Mmirwa, yo o sa leng a busa Babirwa go simolola ka 1972 go fitlhelela 2016 fa a tlogela tiro ka bogodi, o galaleditswe ke morafe wa gagwe ba mo kaya e le motho yo o mamu, boikokobetso le go rata kagiso.

Le fa Kgosi Mmirwa a tlhokafetse a godile, leso la gagwe le garotse bontsi dipelo, ka ba setse ba tlhologelelwa puso ya gagwe e e neng e le ledula.

Ba re Kgosi Mmirwa e ne e le motho le go aga setshaba, a rotloetsa kagiso e bile a tlhokomela bana le ba e seng ba gagwe tota.

Morwa wa gagwe, ebong Kgosi Letso Malema, a re o gola a fitlhela rraagwe a afa badirelapuso boroko mo matlong a gagwe a Setswana a a neng a le mantsi mo segotlong, mo godimo ga moo a ba tlhokomela setsadi. Ka nako eo puso e ne e ise e agele badiri matlo e bile go sena a phiriso mo motseng.

Totatota, Kgosi Mmirwa o bolelwa fa a ne a kgathalela mongwe le mongwe. Mo pusong ya gagwe go ne go sena motho yo o pegwang molato a ise a atlholwe ka bosupi jo bo papametseng.

Kgosi Letso a re o gata mo dikgatong tsa mokaloba, yo gangwe le gape a neng a dirisa di-tsa gagwe mo ditirong tsa setshaba gore morafe wa gagwe o tlhokomelesege.

A re rraagwe, yo o neng a tlotlile morero e le tsela ya go aga morafe, o ne a aga a mo kgothatsa go bereka le mokhanselara le komiti ya ditlhabololo ka gore go tlhoka go dira jalo go ka babalela morafe.

Kgosi Mmirwa go bolelwa fa a ne a se magang a thata, a tlotla seriti sa gagwe mme a le kelotlhoko. O ne a sa itse go tsena motho ganong kgotsa go mo kgaupetsa fa a bua, mo bangwe ba neng ba tle ba ipotse gore a le go reetsa o reeditse.

 Rre Daniel Makwana, malomaagwe Kgosi Mmirwa e bile e le mokhanselara wa pele wa Molalatau o netefatsa fa Kgosi Mmirwa a ne a le bonya go ikarabela le fa a ne a rumolwa.

O ne a reetsa ka kelotlhoko lefoko lengwe le lengwe le le tswang mo molomong wa gago a go fa nako ya go ntsha se se mo mafatlheng a sa go kgaupetse, ga bolela Rre Makwana, a tlatsa ka go re Kgosi Mmirwa o ne a kgona go thubega ka setshego e le go thusa batho go wela dibete.

Ka tebo ya gagwe, batho ba ne ba tshaba Kgosi Mmirwa ba akanya gore ga a bonolo go bua le ene ka gantsi o ne a ikgogona mo bathung e bile a ya kgotleng fela fa go tlhokega.

Kgosi Mmirwa o tlhokafala jaana a na le bana ba le lesome le boraro, ba roba bobedi e le ba mosadi wa ntlha, Mohumagadi Selebogo yo o tswang goora Makgosa, e leng mmaagwe Letso. Ba le bararo ke ba ga Rebecca Malema mohumagadi yo o ribameng mo bogompienong.

Mohumagadi Selebogo o tlhokafetse ka 1988 mme Kgosi Mmirwa a tsaya Mohumagadi Rebecca ka 2016.

Kgosi Mmirwa, morwa Selamolela o busitse morafe wa Molalatau ngwaga fela a bo a setse a tlhongwa go nna kgosi ya Babirwa ka 1972, thomo e e mo fuduseditseng Bobonong, motse mogolo wa Babirwa.

Babirwa ba ne ba romile Rre Walter Mosweu go ba tswa maoto mme a tsena ka Rangwane Simon Radikhudu Malema, yo e rileng go ise go ye gope a supa fa Mmirwa a ka tsaya setilo sa bogosi.

Ka motlha oo Kgosi Pharitlhi e ne e le motshwareledi go fitlhelela 2012 fa Kgosi Letso a ne a bewa mo setilong sa gagwe.

Kgosi Boitumelo Garegae yo Kgosi Mmirwa a neng a mo tlhoma go busa kwa Moletemane mme jaanong a tlogetse tiro ka bogodi, sa gagwe e ne e le dikgalaletso fela fa BOPA e mo fitlhela kwa lesong ka Labobedi.

Kgosi Garegae yo o tsholetsweng kwa Serowe e bile e le Mongwato, o akgotse Kgosi Mmirwa go bo a lole go ntsha bogosi jwa Bobirwa mo go ba ga Mmangwato ka fa tlase ga ga Kgosi Moloi Sekgoma ka 1972.

Kgosi Mmirwa ka e ne e le Mmusi yo o ponelopele, o bolelwa fa a ne a etelela mephato mo go ageng dikole tsotlhe tsa Bobonong, kwa ntle ga se sebotlana se se bidiwang Bobonong se a se fitlhetseng fa a simolola go busa. O simolotse ka se sebotlana sa Mafetsakgang.

E re ka a busitse Babirwa ka nako e nne naga ya bone e le lekgwere e bile e sa tlhabologa, Kgosi Mmirwa o ne a lwa ka gotlhe gore Bobonong e nne ene motse mogolo wa Bobirwa e seng Sefophe jaaka go ne go akantswe kwa tshimologong, ga bua Kgosi Garegae.

Kgosi Mmirwa go lebega a ne a belaela gore fa Sefophe a ka nna motsemogolo wa Bobirwa, bontsi jwa morafe bo ne bo tlaa tlhaela ditirelo ka jaana motse oo o atamalane thata le khansele ya Selebi Phikwe.

Le fa a fudusetsa kgotla fa e leng teng gompieno, Babirwa ka bontsi ba ne ba le kgatlhanong le tshwetso eo, ba ikana gore ga ba na go ya diphuthegong ka jaana e le kgakala le bone.

Modumedi wa Sekeresete mo phuthegong Assemblies of God, yo o tlhokafalang jaana a ntse a ikakatletse ka mekgoro, Kgosi Mmirwa o betletse morwawe, Letso tsela ya go busa bonolonolo.

O tlogeletse Kgosi Letso motlobo wa ditso tsa metse ya Bobirwa ka dithuto tse a neng a di mo neela fa a sale botshelong. Bokhutlo