08 Apr 2025

Mhama o o ikemetseng ka nosi le bagwebi ba solegelwa molemo ke dikitso tse di tswang mo thutong e kgolwane, ka jalo ba tshwanetse go tsaya boikarabelo jwa go rotloetsa le go godisa thuto e kgolwane.

Go buile jalo Tona wa Thuto e Kgolwane, Rre Prince Maele ka mafelo a beke fa a ne a rola molaetsa kwa moletlong wa dijo tsa maitseboa o o neng o lebaganye le go rotloetsa botsalano magareng ga bagwebi le ba-tsaya karolo ba bangwe.

 Moletlo o ne o rulagantswe ke ba sekole sa ithutelo booki sa Kanye ka fa tlase ga setlhogo se se reng; Kgolo ya Tlhwatlhwa ya Sekole sa Booki sa Kanye.

“Mo malatsing ano thuto le kgwebo ga di sa tlhole e le maphata a a farologanyeng ka jaana di goga mmogo go tsamaisa le go goga tlhabologo ya lefatshe.

Tona Maele o kaile fa tirisanyo mmogo e rotloetsa go abelana dikitso, dithutego gammogo le ditharabololo mo diemong tse di sa iketlang e le mokgwa wa go tokafatsa lefatshe.

O ne a supa fa a itumeletse tshologelo ya bagwebi kwa moletlong oo.

O tlhalositse fa dikole tsa ithutuntsho di tshwana le sekole sa ithutelo booki sa Kanye, e le ba-tsaya karolo ba ba botlhokwa mo go aloseng bodiredi jo bo rutegileng jo mhama wa botsogo o ikaegileng ka jone.

Mo ntlheng e nngwe o kaile fa dikgwebo di thusa ka meamuso, kgolagano le menyetla e e tshegetsang le go atolosa dikole tse. O ne a ba a rotloetsa bagwebi le ba-tsaya karolo ba bangwe go tshwara ka thata ka jaana setshaba se tlhokana le go godisa lefatshe.

A re mo malatsing ano dikitso ke konokono mo go gateleng pele, mo go direng ditlhamo, mo godimo ga moo o supile fa e le motheo wa kgolo ya itsholelo.

“Mo Botswana thuto ke konokono ya itsholelo e e ikaegileng ka dikitso,” ga tlhalosa Tona Maele, a tlatsa ka go re go aga itsholelo e e ikaegileg ka dikitso, setshaba se tshwanelwa ke go gama nonofo e e bonwang mo ditirisanyong mmogo le botsalano jwa mehama ka go farologana.

A re dikole di tshwanetse go fetoga pele, morago ke gone di itse go ka tlhabolola dikitso. O ne a gakolola gore thuto e tshwanetse go fa baithuti maele le go ba tiisa go dirisa dikitso go na le go bua fela se se mo makwalong. A re seo se ka thusa go aga itsholelo le go aga setshaba se se itsholetseng se na le meamuso.

Tona Maele o ne a bo a supa botlhokwa jwa gore sekole se tseye boikarabelo mo go direleng morafe o se mo go one.

A re go dira jalo go ka lere ditharabololo tsa sennelaruri tse di ka tswelang mosola mhama wa thuto gammogo le morafe ka kakaretso. O ne a leboga Mohumagadi wa ga Ngwaketse Mme Masetsebi Gaseitsewe yo o thwaraganeng le sekole sa booki mo phepafatsong ya motse wa Kanye.

Go sale foo, mogokgo wa sekole, Mme Carol Shabane o ne a kopa Tona Maele go sekaseka dithuso tsa madi tse di neelwang lephata la thuto ya botsogo go rotlotsa kgolo ya bodiredi jo bo motia mo tlhokomelong ya botsogo gammogo le go tlhabologa ga thuto .

Mme Shabane o rotloeditse dikole tse dingwe tsa ithutelo booki ga mmogo le makalana a dipatlisiso go tshwaraganela go dipatlisiso. O ne a kopa gore go nne le ketalano ga makalana a thuto go godisa ditlhamo gammogo le go abelana dikitso. A re go dira jalo go ka tlhatlosa dithuto tsa botsogo mo Botswana. ENDS