27 Mar 2025

Mapodisi a Shakawe a tlhotlhomisa tiragalo e mo yone monna wa dingwaga tse di masome mabedi a fitlhetsweng a akgega mo ditlhomesong tsa ntlo kwa kgotleng ya Shaoshoko mo Shakawe.

Mo potsolotsong,  mogolwane wa mapodisi a Shakawe, Superintendent Ogolotse Tampa o tlhalositse fa ba amogetse pego eo ka nako ya lesome mo mosong wa Mosupologo.

Supt Tampa a re ba ne ba ya kwa lefelong la tiragalo kwa ba fitlhetseng monna yoo  a dirisitse lethale go ikaletsa.

A re o ne a ragosediwa kwa kokelong ya JP Kavindama, kwa ba bongaka ba fetileng ba rurifatsa fa a tlhokafetse.

Supt Tampa a re ditlhotlhomiso di supa fa monna yoo, a ne a itisitse le mmaagwe mo bosigong jwa Tshipi, mme ba kgaogana ka nako ya boferabongwe mongwe le mongwe a ya go robala.

A re mmaagwe moswi o tlhalositse fa a ne a sa supe fa a na le bokoa bope kgotsa a tshwenyegile mo maikutlong, a tlatsa ka gore moswi ga a tlogela molaetsa ope.

Supt Tampa o tsweletse ka gore mmele wa moswi o kwa kokelong ya JP Kavindama go letela ditlhatlhobo tsa se se ka tswang se bakile leso.

O tlhalositse fa tiragalo eo e le ya bone mo kgaolong sa le ngwaga ono o simologa, ka jalo a kopa setshaba gore fa ba na le mathata ba kope bogakolodi kwa dikgosing, mapodisi kgotsa ba boipelego go na le go tsaya ditshwetso tsa go tshwana le tse. ENDS