20 Mar 2025

Go sa tlotla le go latlhega ga ngwao ga go jese Kgosi Morgan Kenalemang wa kgotla ya Timbi kwa Tutume di welang.

Kgosi Kenalemang a re basha kana banana ke bone ba digogang kwa pele mo go timetseng batho mo go tsa ngwao. A re banana ba na le go tsaya mekgwa le tsamaiso tsa merafe e sele, batla ba di tsenya mo bathong.

Kgosi o gateletse ka go re morafe mongwe le mongwe o na le ngwao le ditsamaiso tsa one, fela jaaka banni ba kgotla ya Timbi le Magapatona ba na le letsatsi la Laboraro o o faphagileng o bitswang nsi ka puo ya Sekalaka.

Kgosi a re Laboraro ke letsatsi le le faphagileng le le seegetsweng fa thoko le go sa letlelelweng balemi go tsena mo tshimong kana go dira tiro epe mo tshimong. A re ka nako ya bone fa ba gola,ope yo o neng a ikgatholosa ditaelo tseo o ne a tseelwa kgato. O ile a bolela fa mo malatsing a gompieno batho ba na le ditshwanelo le dithata ka go dira jaaka ba kgona.

Kgosi Kenalemang o ne a supa fa a atla mogopolo wa Tona ya Dikgaolo le Ngwao Rre Ketlhalefile Motshegwa, wa go tsosolosa ngwao, a re seo se tlaa thusa.

Mongwe wa balemi ba kgotla ya Magapatona, Rre Thabo Makwala a re ba tsholwa ba fitlhela bagolo ba tshegeditse ngwao eo ya go ilela letsatsi la Laboraro ele balemi. Rre Makwala a re balemi ba banana ba lekile go sala morago se mabutswapele a neng a se dira e bile a dumela mo go sone, mme go a ba pitlaganya ka nako ke yone e seyong.

A re e le banana ba lebaganwe ke kgwetlho ya go pataganya tiro le temo ka jalo ga ba na malatsi a mantsi, e bile go ntsha letsatsi le lengwe ke poelo morago le tatlhegelo. O supile fa sengwe se se tsisang ketsaetsego mo go bone ke go re fa ba tlhalefa ba boleletswe fa letsatsi leo le tlhomilwe e le taelo go tswa kwa ga Ngwali.

A re kgang eo ke yone e ba pitlaganyang ka bangwe ba bone ba sa dumele mo go Ngwali. Rre Makwala o gakolotse boeteledipele go ba ruta ka dilo dingwe go re le bone ba di tlhaloganye, e bile fa dingwe go ka lemogwa fa di sena bokao bope di tlogelwe ka jalo go dirwe se se tlaa siamelang batho botlhe.

Mongwe wa mabutswapele, Mme Masolomon Mbika yo e leng  ba romiwang kwa ga Ngwali, a re ba tswa kgakala ba ilela letsatsi leo. Mme Mbika a re bogologolo batho ba santse ba tlotla ngwao le go reetsa molao wa magosi, letsatsi leo le ne le tlotlwa.

A re le letsatsi la Tshipi le lone go ne go sa letlelelwe ope go dira sepe ka lone, a gatelela ka go re yo o tlolang molao o ne a atlholwa podi fela ya pholo e e jewang ke morafe.
Mme Mbika a re ka diphetogo di tla ka tsele le tsele, banana ga ba sa tlhole ba tlotla seo. BOKHUTLO