22 Jan 2025

Tiego ya go bewa ditsha le letlhoko la metsi mo Kumakwane mo kgaolong ya botlhophi ya Kumakwane/Thamaga ga e itumedise banni.

Fa ba bua mo phuthegong ya kgotla e e neng e buisiwa ke mopalamente wa bone Rre Palelo Motaosane ka Mosupologo, morafe o ne wa supa fa botlhoki joo bo ba jesetsa mo kgobedung.

E rile modulasetilo wa komiti ya ditlhabololo tsa motse Mme Rosinah Tlhase a fa tekodiso, a supa fa ba kgona go nna malatsi go sena metsi.

Mme Tlhase a re letlhoko la bone le tswa kgakala mme ba koporase ya metsi ba bonya go tsiboga, a supa fa le one metsi a a tisiwang ke koporase eo ka ditanka a sa ba lekane.

Modulasetilo wa komiti ya ditlhabololo tsa motse o ne a supa fa gona le sebaka se se leele go sa bewe ditsha mo motseng wa bone. A re banana ba eletsa go bewa ditsha gore ba nne le malwapa le gone go godisa dotlhabololo mo motseng. Mme Tlhase ka jalo o ne a kopa gore peo ya ditsha mo motseng wa bone e tsibogelwa.

Mo go tse dingwe, o ne a supa fa ba lebogela lenaneo la ditlhabololo la LG 11 le ka lone ba kgonneng go dira dikago mo motseng wa bone. A re kago ya ntlo lehalahala ya motse (community hall) ga e na metsi le motlakase mme e bile magodu ba ne ba utswa mogala wa motlakase mme seo sa ba busetsa kwa morago.

Mme Tlhase o ne a supa fa borukhuthi bo le kwa godimo mo motseng ebile ba ikaelela go tsosolosa komiti ya borukhuthi go lwantsha seemo seo. O ne a wetsa ka go supa fa ditsela tsa bone tse di tsenngwang ditena di sa fele mme seo se sa arabe selelo sa bone sa paakanyo ya ditsela.

Mopalamente, Rre Motaosane o ne a leboga morafe wa Kumakwane go bo ba mo file sebaka sa go nna mopalamente wa bone a supa fa seo se mo fa tlotla e kgolo bogolo jang ka a ne a na le lenaneo la go tlisa dilthabololo.

A  re nngwe ya dilo tse di sa mo robatseng ke go tlhoka go bewa ditsha ga morafe. O tlhalositse fa lekgotlana la kabo ditsha le supa fa tiego e tswa kwa khanseleng. Rre Motaosane o ne a kopa khansele gore e tsiboge go thusa ba kabo ditsha ka e le bone ba segang lefatshe gore le abiwe. Mopalamente a re setsha ke tshwanelo ya motswana mongwe le mongwe.

O ne a supa fa puso e fetogile mme seo se raya gore ba ba busang mo nakong ya gompieno ba ya go itirela lenaneo la ditlogamaano go ya ka fa ba bonang go le maleba ka teng. Rre Motaosane a re dingwe tsa dikeletso tsa bone gongwe ga dina go atlega jaaka ba ne ba solofetse go tswa mo go reng puso ya nako eno e ya go leba dilo jang.

A re ba emetse go boela palamenteng go ya go baakanya lenaneo la NDP 12 le ka lone le tla ba kaelang gore go iwa kae. Rre Motaosane are o itse ka seemo sa metsi e bile a leka bojotlhe go thusa go rarabolola seemo.

E rile modulasetilo wa lekgotlana la kabo ditsha la Thamaga a fiwa sebaka sa go akgela mo go tsa kabo ditsha, Rre Fredrick Malebye a re ba ne ba sokola ka go bona lefatshe mo go beng ba lone gore ba kgone go le abela setshaba.

A re mo nakong e e fetileng dipuisano le bangwe mo motseng wa Kumakwane di ne di sa felele gope ka gone go sa dumelwane ka dikatso. Are o dumela gore mo nakong e e sa fediseng pelo, ba tla kgona go abela morafe lefatshe mme seo se tla thusa go araba selelo sa bone. BOKHUTLO