12 Jan 2025

Kgosi Keitseng Motshidiemang  o bolokilwe ka Matlhatso kwa Tubu.
Dibui ka go farolagana kwa phitlhong di kaile fa Kgosi Motshidiemang, yo o neng a le kgosi ya pele ya Tubu, a ne a le lorato mo setshabeng, a le senatla e bile a rata ditiro tsa boithaopo.
Kgosi Moitshepi Molelwa wa Gumare o tlhalositse fa a sa le a itse Kgosi Motshidiemang fa ba tsena sekole se se botlana kwa Shakawe.
Kgosi Molelwa a re Kgosi Motshidiemang o ne a etelela pele Tubu go simologa ka 1986 go fitlha a tlogela ka bogodi, kgwedi ya Phalane e ya fifing ka 2022.
A re Kgosi Motshidiemang o ne a le boikobo mo tirong ebile a sena dikgetsi dipe tse di tlhokang kgalemo go tswa ofising e e kgolwane ya kgotla kwa Gumare.
O supile fa ba ne ba tsena kereke e le nngwe, ba bereka sentle ebile ba nna ba kopana ka bokopano jwa lekgotla la dikereke.
Kgosi wa tetlanyo kwa Tubu, Kgosi Chabi Moteti le ene o kaile Kgosi Motshidiemang a ne a le lorato mo setshabeng ebile a diretse Tubu ka natla.
Kgosi Moteti o supile fa Kgosi Motshidiemang a ne a le tlhaga, a bereka thata le komiti ya ditlhabololo tsa motse mo ditirong di tshwana le go dira tshimo ya ditlhare tsa maungo mo motseng le thuo ya dinotshi.
O tlhalositse fa Tubu e ne e le masimo pele mme a tlhomamisiwa go nna motse ka 1985, ya re ka 1986, Kgosi Motshidiemang a tlhomiwa go nna kgosi a tsaya mo go Kgosi Nxhomo Keamogile yo o neng e le kgosi ya tetlanyo.
Kgaitsadie Kgosi Motshidiemang, Mme Moreko Sarefo a re Kgosi Motshidiemang yo o neng a itsiwe ka leina la ‘Eastman’, a goletse kwa Mohembo mme tloga a ya go nna kwa Maun.
A re Kgosi Motshidiemang e ne ele molemi morui wa popota.
Kgosi Motshidiemang o tlhokafetse a le dingwaga tse di masome a le boferabobedi le bone kgwedi eno e tlhola gane morago ga go lwala ka lebaka. ENDS