09 Jan 2025

Dipula tse di tsweletseng ka go na di tsosolositse tsholofelo mo dikgaolong tse di ntseng di tlhaelelwa ke metsi ka jaana metsi a tsweletse ka go oketsega mo matamong go ralala lefatshe leno .
Se se tlhalositswe ke Rre Kabo Baker go tswa koporaseng ya metsi ya Water Utilities Corporation, a re mo matamong a Gaborone, Bokaa le Nnywane, pula e nele ka nako e seemo se neng se tlhobaetsa.
A re selekanyo sa metsi a a mo letamong la Gaborone ke 35.4% yo o lekanyeng go nosa toropo kgolo dikgwedi tse di lesome le bone.
O tlhalositse gore matamo a mangwe jaaka Notwane le la Railways, le mo ditsong le neng le dirisiwa mo matorokong, a thusa go tlhotlha metsi pele ga a ka tsena mo go la Gaborone.
Go bolelwa fa letamo la Gaborone le nosa bontsi, ka jalo le tsaya nako go tlala ka e bile pula ya Gaborone e ntse e se mashetla jaaka mo mafelong a mangwe.
Fa a bua ka letamo la Bokaa, Rre Baker a re le tsamaya fa go 44.5% yo o ka gogang dikgwedi di supa fa go sa tsene metsi ape mo go lone.
Letamo la Nnywane, le e leng lone le lennye go a feta otlhe mo Botswana, le tsamaya kwa go 87.6% yo o ka tshegeletsang ngwaga fa go sa tsene sepe.
Rre Baker a re mo bogompienong letamo la Shashe le la Ntimbale a a tlhatsa ka la Shashe le tsamaya kwa go 101.14%, Ntimbale lone le le kwa go 100.9% fa e sale ka mafelo a beke.
O tsweletse a re letamo la Lotsane le le kileng la bo le kgala bobe, le tlhatlogile thata go tswa mo go 20% go ya ko go 76%, morago ga morwalela wa tikologo ya Palapye fa Letsibogo lone le le kwa go 68.4%.
Rre Baker a re seemo se se solegela thata balemi ka jaanong metsi a go nosetsa a lekane go ntsha dijalo tse di itekanetseng. A re go oketsega ga metsi gape go fokotsa ditshenyegelo tsa go nosetsa.
Le fa go ntse jalo, Rre Baker a re matamo a Gaborone, Bokaa le Nnywane a tsweletse ka go amogela metsi ka dipula di santse di tsweletse.
Rre Baker a re go gosomana ga dipula go tlaa thusa gore batho ba seka ba tlhola ba lekanyediwa metsi jaaka go diragala mo dintlheng dingwe tsa lefatshe leno, a ntse a gakolola Batswana go somarela metsi.
Rre Baker o bile a tlhagisa setshaba go netefatsa gore bana ba babalesegile gore ba seka ba tsewa ke metsi a melatswana kgotsa megojwana ba tshamekela mo go yone.
Mo godimo ga moo,   o kgothaditse bagodi go nna     podimatseba  mo mafelong a a elelang metsi. BOKHUTLO