08 Jan 2025

Kgosi ya pele ya motse wa Tubu, Kgosi Keitseng Motshidiemang o tlhokafetse a le dingwaga tse di masome a ferabobedi le bone (84) kgwedi eno e tlhola gane.

Fa a bua mo potsolotsong, Kgosi wa Tetlano wa motse wa Tubu, Kgosi Chabi Moteti, o tlhalositse fa Kgosi Motshidiemang e ne ele motho yo o lorato mo setshabeng ebile a diretse motse wa Tubu ka natla.  O tlhalositse fa Kgosi Motshidiemang a ne a le tlhaga ka jalo a kile a etelela dikomiti dingwe pele jaaka komiti ya sekolo sa ditiro tsa diatla sa Ngethu mo Gumare. 

A re Kgosi Motshidiemang o ne a supa boeteledipele jwa gagwe jwa motia ka go tsaya karolo go dira borogo jwa mapako ka ngwaga wa 2010 fa motse wa Tubu o ne wa amiwa ke morwalela. 

A tlatsa ka gore Kgosi Motshidiemang o ne a bereka ka tshwaragano le komiti ya ditlhabololo tsa motse. 

Kgosi Moteti o tlhalositse fa go tswa ditsong motse wa Tubu e ne ele masimo mme wa tlhomamisiwa go nna motse ka ngwaga wa 1985. 

A re ka jalo Kgosi Motshidiemang o ne a tlhomiwa go nna Kgosi ya motse oo ka ngwaga wa 1985 a tsaya mo go Kgosi Nxhomo Keamogile yo o neng ele Kgosi ya Tetano. 

A re Kgosi Motshidiemang o ne a tshwara bogosi jwa motse wa Tubu go fitlhela a tlogela tiro ka bogodi ka ngwaga wa 2022. 

Kgosi Motshidiemang o tlogela mohumagadi le bana ba le lesome le bongwe, bomme ba le boferabobedi le borre ba bararo le banabana. ENDS