17 Dec 2024

Makhanselara a kgaolo ya bokone botlhaba a sa tswa go ikanisiwa ga mmogo le go tlhopha modulasetilo le mothusi wa gagwe wa khansele. 

Makhanselara ba ikanisitswe ke mothusa molaodi wa kgaolo, Rre Thusang Nyoni mo phuthegong e e haphegileng ya khansele kgwedi eno e le lesome le borataro.

Khasele ya bokone botlhaba e ne e ikanisa makhanselara a le masome a mabedi le boferabobedi, mo palong eo a le marataro e le a a itlhophetsweng ke tona.

Mokhanselara wa kgaolwana ya Mosojane/Mulambakwena/Pole, Rre Mbaakanyi Smart o tlhophilwe modulasetilo a sena moganetsi. Fa mothusa modulasetilo e le mokhanselara wa Masingwaneng/Mambo/Sechele, Rre Keoagile Gola, le ene a tlhophilwe ntle le moganetsi.

Fa ba amogela thomo eo, Rre Smart le Rre Gola ba ne ba lebogela go bo bakaulengwe ba bone ba supile tshepo mo go bone, ka go ba fa boikarabelo jwa go etelela khansele eo pele.

Ba kopile tirisanyo-mmogo le neelano magareng ga bone e le makhanselara, bodiredi le ba-na le seabe botlhe mo kgaolong, ba supa go dira jalo go ba kgontsha go direla khansele ya bone ka bokgabane ga mmogo le setshaba se se supileng tshepho mo go bone ka go ba romela khanseleng.

Ba ne ba netefatsa gore ba diragatsa thomo eo ka botswapelo, ka jalo ba bolela fa ba ka kgona fela ka kemonokeng ya makhanselara le bodiredi. Mokhanselara Smart a re fa bodiredi le makhanselara ba ka bereka ba le seopo sengwe, go ka ba thusa go tokafatsa go isiwa ga ditirelo kwa setshabeng.

A re seo gape se ka ba thusa go diragatsa dingwe tse Tautona Advocate Duma Boko a eletsang go bona di diragala mo tsamaisong ya dikhansele, mme go thuse gape gore gofitlhelelwe tse di tshepisitsweng setshaba. O botlhe go mo gakolola fa ba bona a tswa mo tseleng, a supa fa le ene a ikemiseditse go amogela bogakolodi jwa bone ka dinako tsotlhe.

Mo go la gagwe, Mokhanselara Gola o rotloeditse neelano, a re ka jalo makhanselara ka bone ba tlhaloganye gore fa a ka palelwa, le bone ba tlaa bo ba paletswe.

O kopile gore go beelwe kwa thoko mebala ya diphathi tsa bone tsa sepolotiki le mme ba itebaganye le go diragatsa maitlamo a khansele, a tlatsa ka go ba gakolola go ipaya mo dinakong tebang le ditsamaiso le melawana e e tsamaisang khansele.

Rre Gola a re go dira jalo go ka dira gore khansele e tswelele ka mowa wa neelano e bile are go ka ba thusa go isa kgaolo ya bokone botlhaba golo gongwe. BOKHUTLO