Superintendent Vincent Pitseetsile o boletse mo potsolotsong gore tiragalo eo e tlogetse diofisi di ka nna lesome le bosupa di amegile.

“Diofisi tse di amegileng ke tsa lephata la ga Molaodi le tsa Kanye Administrative Authority (KAA). Go supegile gore go utswilwe projector ya madi a kana ka P10 400.00, le selotlele sa koloi ya Isuzu,” ga tlhalosa Superintendent Pitseetsile.

O ne a tswelela ka go tlhalosa gore ere le ntswa selotlele sa Isuzu se sa bonwa, koloi yone e ne e leteng ka nako ya tshekatsheko ya ba sepodisi mo RAC. 

O kaile gore ba sepodise ba ne ba tsaya tshwetso ya go tsaya koloi eo go e tshegetsa ko kampeng le go e babalela go hema maikaelelo ape a dilalome tseo.

O ne a tswelela ka go tlhalosa gore mo di ofising di ka nna tharo tsa KAA go ne ga utswiwa dithoto di tshwana khomputara ya HP ya madi a a ka tshwarang P17 000.00, seboloka dikitso (hard drive) ya P1 200.00, dipikara tsa khomputara tsa madi a a ka tshwarang P500.00 le khomputara ya modiro wa Compaq ya madi a ka tshwarang P7000.00

Mo ofising e nngwe go ne ga utswiwa potomente e ntsho ya madi a a ka tshwarang P900.00, e na le sekgwama se se mmala o morokwa, mme sone se kaiwa se ne se sena sepe mo teng.

Superintendent Pitseetsile o tlhalositse fa ba santse ba thusana le ba kompone e e thapilweng go sireletsa dikago le dithoto mo RAC mo ditlhotlhomisong fa magodu ao a santse a ise a utlwalelwe.

Mo go e nngwe rre Pitseetsile a re e ne yare mapodisi ba ntse ba le mo go phuruphutsheng motse bosheng, ba longwa tsebe gore marekisetso mangwe a nama a folosa nama e go belaesegang e se kafa molaong.

“Fa ba sepodise ba tsibogela kgang eo, ba fitlhela ka boammaaruri go na le dinama tse dintsi foo le makawana a le mabedi, wa digwaga tse di masome a mane le boherabongwe e bile e le mothusi mo marekisetsong a nama le wa ngwaga tse di masome mabedi yo le ene e leng mogolwane mo marekisetsong,” ga tlhalosa Superintendent Pitseetsile.

A re fa bo rre bao baya sepodise motlhala, bobedi boo bo supile fa nama e tsisitswe ke bangwe batho ba ba sa ba itseng. 

Ba kaile gore ba laetswe ke mong wa marekisetso go bulela batho bao go baya nama. Ka gorialo Superintendent Pitseetsile o tlhalositse gore ba santse ba le mo motlhaleng wa batho baba beileng nama ga mmogo le mong wa marekisetso.

Superintendent Pitseetsile o supile fa dikgang tsa marekisetso a nama di tshwenya fela thata ka jaana bagwebi bangwe ba sa sale melawana ya go tlhaba morago. 

A re molao wa go rekisa nama o ba laela gore ba bolaele dikgomo ko matlhabelong di be di tlhatlhobiwa mme a bo e le gone dinama di ka tsisiwang mo marekisetsong, selo se a boletseng fa ba sa se dire. 

A re boemong jwa seo ba tsenya nama ka bokukuntshwane mo marekisetsong a bone. 

O tlhalositse gore selo se se paledisa batlhatlhobi ba nama go ka rurifatsa fa nama eo e ne e tlhathobilwe kgotsa e babalesegile go ka jewa. BOKHUTLO