27 Oct 2024

Mothusa Tautona, Rre Slumber Tsogwane o ne a etetse Boora Shomana kwa Seronga go ba gomotsa ka Labotlhano, morago ga go tlhokafala ga ga Mme Mobeao Shomana.

Mme Shomana o tlhokafetse a le dingwaga di le masome a supa le botlhano, kgwedi ya Phalane e le lesome le boferabongwe.

Rre Tsogwane o ne a gakolola Boora Shomana gore Modimo a na le bone, e bile ke e ne a laolang gore botshelo bo tla leng le gore batho ba tloga leng mo lefatsheng.

Rre Tsogwane o supile fa leso e le thulaganyo ya Modimo mme batho ba tsamaya ka ditsela tse di farologaneng.

O gakolotse Rre le bana ba ga Mme Shomana gore ba mo gakologelwe ka ditiro tse di molemo tse a di dirileng fa a le mo botshelong.

Moemedi wa ba lelwapa, Rre Dikaelo Shomana o supile fa Mme Shomana a ne a lwala dingwaga di le dintsi mme a supa go tokafala mo malatsing pele a tlhokafala, selo se se neng sa ba fa tsholofelo, mme morago seemo sa bolwetsi sa fetoga. 

Mme Shomana go tlhalosiwa fa a ne a tlhokafalelela kwa kokelong ya Letsholathebe kwa Maun.

Rre Shomana o lebogile Mothusa Tautona go ba lekola a re seo se a itumedisa ka e le motsadi wa bone.

Mme Shomana ke mosadi wa ga Rre Pitisi Shomana, yo o kileng a nna mokhanselara mo khanseleng ya Okavango. BOKHUTLO