27 Oct 2024

Tona wa Tlhabololo Lefatshe le Phatlalatso ya Metsi, Dr Kefentse Mzwinila a re tlhabololo ya phatlalatso ya metsi kwa Sefophe e tla tokafatsa seemo sa tlhaelo ya metsi wa motseng oo.

Dr Mzwinila o buile se, kwa tshimolodisong ya phatlalatso ya metsi a a tlhatswitsweng kwa Sefophe bosheng.

 Koporase ya metsi e ne ya tsenya ditanka tse di kwa godimo tse di tshwarang metsi a selekanyo sa 85 cubic litres e le tlhabololo e e tlaa thusang gore motse o akole metsi a boleng jo bo kwa godimo e bile a lekane.

Tanka ya selekanyo sa 5 000 cubic metres e pegilwe mo ditshiping tsa boleele jwa 15m go tlhomamisa gore metsi a phatlalala le motse wa Sefhophe.

Tanka eo e agilwe ka madi a a fetang P8.6 million. 

Dr Mzwinila a re tlhabololo eo, e tla tokafatsa thata tlhaelo e e ntseng e le teng mo motseng bogolo jang kwa ditsheng tse disha.

Dr Mzwinila o tlhalositse fa kago e ntsha ya tanka e tsile morago fa go sena go  lemogiwa fa ditanka tse di ntseng di nosa motse oo di le dinnye e bile di le kwa tlase mo di neng di sa kgone go siela motse otlhe metsi.

A re tlhabololo eo, e bulela tse dingwe tse e tla a reng mo legatong la bobedi la ditlogamaano tsa lesome le bobedi, lephata le bo le ka sekaseka go dira moalo o mosha wa phatlalatso ya metsi kwa motseng wa Sefhophe.

Dr Mzwinila a re puso e ikemiseditse go isa ditlhabololo tsa boleng kwa setshabeng ka nako e bile e le tsa madi a a dumalanweng fela jaaka lephata la gagwe le neetswe boikarabelo jwa go bona gore batho ba bona metsi a boleng jo bo rileng.

Tona a re ditlhabololo ka bontsi di dirisa maranyane, a tlhalosa gore puso e setse e simolodisitse smart metres kwa Gaborone, mme e tla a re morago, e phatlaladiwe lefatshe ka bophara. 

O kaile fa se se tsile morago ga gore setshaba se ikuele ka madi a mantsi a ba a lopiwang ke ba lekalana la Water Utilities Corporation, a re se, gape e le tsela nngwe ya go laola tiriso ya metsi e e kwa godimo.

Le fa gontse jalo, a re puso e tsere tshwetso ya go reka ditsha tsa masimo mo bangweng mme di bo di ka tsenngwa moalo wa metsi gore di abelwe ba ba di tlhokang.

 Dr Mzwinila o ne a lebogela batho ba Sefhophe bopelotelele jwa bone ka tiro e tsere lobaka le leleele go wela.

Rre Goitseone Tshiamiso, mogolwane go tswa kwa Water Utilities Corporation o kaile fa tanka e lekane go siela banni ba motse wa Sefhophe metsi mo dingwageng tse di tlang tse di masome a mabedi ka ntlha ya gore boleng jwa yone e le jo bo kwa godimo.

A re selekanyo sa metsi a a tla a bong a tlhatswiwa a lekane go tlatsa tanka ka selekanyo sa 85 per cent mme a lekane go ka nowa mo malatsing a mabedi, a tlhalosa fa se se ba neela sebaka sa go tsibogela se se tla a bong se tlhoka go baakanngwa mme batho bone ba tsweletse ba a nwa metsi.

O kaile fa tiro e ntle e, e dirilwe ke dikopmpone tsa Batswana e bile ba ne ba tlhapile Batswana ka bone. BOKHUTLO