Go ya ka mookamela mapodisi a Tsabong Superintendent Christopher David o ne a tlhalosa fa e ne ya re ka Labotlhano bosigo batsadi ba ngwana wa mosetsana ba ya go ikuela fa ba sa bone ngwana wa bone morago ga go ya sekoleng.

Supt David o ne a supa fa bangwe ba ne ba bona mo maranyaneng a Facebook go na le molaetsa o o kwadilweng “Rest in Peace” o o neng o ama mosetsanyana yoo le mosimanyana mongwe.

O boletse fa mapodisi ba ne ba tswelela ka ditlhotlhomiso mme ba fitlhela baithuti boo babedi ba akgega mo ditlhomesong tsa ntlo nngwe go ga bapa le sekole.

Supt David o boletse fa ba ne ba ba ragosetsa kwa kokelong ya Tsabong kwa ba bongaka ba fetileng ba tlhomamisa fa ba setse ba tlhokafetse.

O boletse fa go belaesega fa wa mosimane a ne a dirisa terata go gapa matshelo a bone.

A re direpa di mo setsidifatsing mo Tsabong mme e tlaa re mo bogaufing di romelwe kwa kokelong ya Princess Marina go ya go tlhatlhobiwa ke ba bongaka fa ditlhotlhomiso tsa mapodise le tsone di santse di tsweletse.

Supt David o tlhalositse fa baswi ba tlholega mo Tsabong mme wa mosimane a ne a  le dingwaga tse di lesome le boferabobedi mme a ne a dira mophato wa bone fa wa mosetsana a ne a dira mophato wa boraro mme a ne a le dingwaga di le lesome le botlhano.

Mabapi le tiragalo eo o  ne a tswelela ka go tlhalosa fa sekole seo se tshwenya thata ka dikgang tsa botlhoka tsebe mme ebile mapodisi a itemogetse seo ba bo ba tsaya kgato ya go tshwara dithuto-seka-dipuisano makgetho a mabedi mo ngwageng ono, maikaelelo e le go kgalema le go gakolola.

Supt David o ne a supa fa gape ba tswa kgakala ba tshwaraganye le dikgosi le ba lephata la thuto mabapi le boitshwaro jo bo sa kgatlhiseng jwa baithuti ba sekole seo mme a kopa batsadi, dikereke le batsaya karolo ba bangwe  go nna le seabe mo kagong le go aga bana sesha ka e le bone babusi ba lefatshe leno ba ka moso. Bokhutlo