17 Sep 2024

Ba Lephata la Building Works Development and Maintenance (BWDM) mo Palapye ba tlhomile Rre Leaitse Tlhabologo go nna Kgosi ya bone.

Fa a bua ko tirong ya go tlhomamisa Rre Tlhabologo, Kgosi Boretetse Ketlogetswe  wa kgotla ya Madiba mo Palapye o ne a tlhalosa fa  tiro ya kgosi e le go etelela batho pele ka lerato le kagiso.

A re moono wa lephata la BWDM o botlhokwa ka jaana dikgang tsa bone di tlaa rarabololwa  mo lephateng.

A  re tiro ya kgosi ke go aga, go ruta le go goga batho, ka jalo a tlhalosa fa e batla bopelotelele le boineelo.

Kgosi Ketlogetswe a re  kgosi ga a gogele kwa thoko mme o a  tlhamalala  e bile ga a tseye letlhakore.

O gakolotse Rre Tlhabologo gore o ka kgona tiro ya gagwe fa a  tshwaragane le borrangwanagwe kgosi le morafe wa gagwe mo tirong ka ke bone bagakolodi ba gagwe.

Mo go tse dingwe o gakolotse borre go tsaya lekgotla la bone la Men’s Sector ka tlhoafalo ka ke ko ba ipuang teng ba le nosi ba rutana ka dikgwetlho tsa botshelo.

Kgosi Ketlogetswe a re go le gantsi borre ga ba bue mathata a bone mme ba feletse ba tsaya ditshwetso tse e seng tsone.

A re nako e ntsi go buiwa ka botlhoka tsebe jwa bana,  go sa  lebelelwe boitsholo jwa batsadi ba bone, a tlhalosa fa batsadi bangwe ba tlhoka maitseo fa pele ga bana.

Kgosi Ketlogetswe a re puso e tshwenyegile ke kgokgontsho ya bong e e amang bomme le bana, mme a kopa borre gore ba fetoge.

A re o solofela gore Rre Tlhabologo o tla dirisa kgotla ya BWDM go aga borre ba lephata, go bua kgang tsa bone ba gakololana ba kgothatsana.

Fa amogela thomo, Rre Tlhabologo yo jaanong a itsweng jaaka Kgosi Tlhabologo o ne a leboga badiri ka ene go bo ba nnile  le tshepho mo go ene. 

A re o dumela gore go na le se ba se bonang mo go ene ka jalo a ba solofetsa gore ga a kitla a ba swabisa ka gope.

Kgosi Tlhabologo o kopile borre gore ba fetole dikakanyo, boitsholo le mekgwa, ba itirele leina le lentle.

Mogolwane wa Lephata la BWDM, Rre Moikotlhai  Kelailwe  a re peo ya kgosi ya lephata e tlaa ba thusa go dirisa kgotla ya borre go rarabolola dikgang tsa bone.

A re go baya kgosi go tlaa ba kgontsha go ya pele, go fokotsa kgokgontsho mme ba nne mo lefelong la tiro lele siametseng botlhe. Bokhutlo