16 Sep 2024

Go tshwaraganela thuto ga bana, batsadi le  barutabana konokono ka seo se thusa go sedimosa tse moithuti a se tlhokang go atlega mo dithutong. 

Mogokgo wa sekole se segolwane sa Pitikwe kwa Lobatse, Mme Matilda Matlhare o buile se ka letsatsi la kabo dimpho ka Labotlhano le bokao jwa lone e neng e le go lemoga le go rotloetsa baithuti le bodiredi jo bo dirileng ka natla, go rotloetsa katlego.

A leboga komiti ya batsadi le barutabana e e dirileng bontle, ka go reka motshine o o ntsifatsang dipampiri, selo se a reng se tlaa ba tlhogofaletsa tiro ka nako ya ditlhatlhobo. 

Mme Matlhare o ne a re komiti e, e rekile ditilo di le masome a marataro. Sebui sa tlotla, moetelediepele wa BOCONGO, Mme Kagiso Molatlhwa o boleletse baithuti fa mongwe le mongwe a na le talente e a tshwaneteng go e tlhagolela gore e gole.

A re nako e, ke yone e e maleba gore ba tseye ditshwetso ka matshelo a bone gore ba batla eng fa ba fetsa dithuto tsa bone.

Mme Molatlhwa a re dikatlego tsa bone di mo diatleng tsa bone ka motho a tshwanetse go roba se a se jwetseng. 

A kopa baithuti go itse gore ditshwetso tse ba ditsayang ke tsone tse di tlaa ba bulelang dikgoro isago.  A re go botlhokwa go nna le lenaneo le ba dirang ditiro le dithuto tsa bone ka teng fa batsadi le barutabana, tiro ya bone e le go ruta le go rotloetsa.

Moithuti wa sekole seo, wa pele yo gape e leng mosimolodisi wa madirelo a Tile Mate kwa Lobatse, Rre Tumelo Sedirwa o kgothaditse baithuti go tsaya ditshwetso tse di maleba le go tsepama mo dithutong ka thuto e tlaa ba bulela dikgoro tsa katlego mo botshelonmg.

Moithuti wa lokwalo lwa boraro yo o gaisitseng baithuti botlhe, Rethabile Otsweleng a kgothaditse baithuti ba bangwe gore ba dirise mananeo a a ka ba thusang gore ba dire sentle mo dithutong tsa bone.

A re ba ikitse gore ke bomang ba batla eng ka gore moithuti o tshwanetse go dumela mo go e ne gore o na le bokgoni a bo a ithuta a bereka ka natla. Bokhutlo