09 Sep 2024

Go leka go tokafatsa seemo sa metsi mo kgaolong ya Letlhakeng, koporase ya metsi ya Water Utilities e tlaa gokela Letlhakeng kwa letangwaneng la phatlalatso metsi la Gaotlhobogwe. 

Se se tla morago ga gore  Molepolole yo o ntseng a nosiwa metsi go tswa kwa letangwaneng la Gaotlhobogwe, a gokelelwe metsi go tswa kwa mafaratlhatlheng a metsi go tswa kwa bokone go ya borwa. 

Mookamela  kgaolo ya Molepolole e e akaretsang Letlhakeng, Rre Edwin Ndlovu, o buile se mo tekodisong ya seemo sa metsi kwa kgaolong ya Letlhakeng bosheng. 

Rre Ndlovu o tlhalosiste gore ba tsere tshwetso ya go dirisa letangwana leo go tokafatsa seemo sa metsi kwa kgaolong ya Letlhakeng. 

A re maikaelelo ke gore Letlhakeng e nne boremelelo jwa phatlalatso ya metsi gore a kgone go nosa metse e e mo kgaolong eo. 

Rre Ndlovu a re ba seegetse thoko P50 million go dira tiro eo, e e akaretsang go atolosa metsi sekgele sa dikilomithara tse di fetang lesome le boferabobedi. 

A re ntswa ditshekatsheko tsa go dira tiro eo di santse di tsweletse, go na le maikaelelo a go tokafatsa mafaratlhatlha a metsi kwa metseng ya kgaolo ya Letlhakeng go akaretsa Letlhakeng, Takatokwane le Salajwe. 

Rre Ndlovu o ne a lekodisa ba-tsaya karolo gore le ntswa koporase eo e saletse kwa morago mo dikgannyeng tsa kgopho ya metsi a a leswe kwa kgaolong ya Letlhakeng, ba tlaa ititaya ka thupana go dira matangwana a kgopho ya metsi a a leswe kwa kgaolong eo. 

A tlhalosa fa mo nakong ya gompieno ba isa metsi ao kwa Molepolole, selo se se ba turelang. 

A re go tlhoka mafaratlhatlha a kgopho ya metsi a a leswe go ka rotloetsa kgotlelesego ya metsi a a ka fa tlase ga lefatshe. 

Mogolwane a re ba ikaelela gore e nne bommantswitswidi mo tirisong ya maranyane go ntsha ditirelo, gore batho ba seka ba tlala kwa diofising tsa bone le gore mafatshe a a mabapi a a dirang tiro e e tshwanang le e, ba tle go tsaya malebela kwa go bone. 

Rre Ndlovu o ne a tlhalosa fa koporase ya metsi e tlhokomela matamo a ferabongwe mo lefatsheng leno lotlhe, le didiba di feta makgolo a robabobedi. 

A supa gape fa seemo sa metsi kwa matamong se ile kwa tlase, mme fa pula e ka sene mo bogaufing, ba tlaa patelesega gore ba tseye kgato e e gagametseng ya tiriso ya metsi. 

Rre Ndlovu o ne a tlhalosa fa lefatshe la Botswana e le lefatshe la komelelo, ka jalo le tshabelelwa ke leuba. 

A re letamo la Gaborone le kile la kgala gotlhelele ka ngwaga wa 2015/16, a bo a tlhalosa fa le gompieno matamo otlhe a gomagomediwa ke go kgala. 

A re fa seemo sa metsi se ya kwa tlase le boleng jwa one bo ya kwa tlase. 

Mogolwane a re mo nakong eno ba nosa 87 per cent  ya Batswana metsi, mme maikaelelo e le go nosa botlhe metsi ka ngwaga wa 2025. 

Mogolwane wa koporase ya metsi kwa Letlhakeng, Rre Thatayaone Warona, a tlhalosa fa ba na le metse e le 23 mo kgaolong ya Letlhakeng, le metsana e le mebedi mme palo ya batho mo kgaolong e le 40 683. 

A tlhalosa fa ba golagantse metse e mengwe go nosiwa ke sediba se le sengwe jaaka metse ya Letlhakeng, Ditshegwane, Sesung le Metsibotlhoko.

Rre Warona a re ba ya go atolosa metsi kwa Letlhakeng, Serinane le Maboane fa kwa Motokwe ba tlaa tsenya motlakase wa marang a letsatsi go oketsa go ntshiwa ga metsi koo. 

A re ba tlaa phunya didiba di le tharo kwa Ditshegwane le go tsenya tanka ya metsi ka mabeelo a sa lekana. 

Mogolwane go tswa kwa koporaseng ya metsi kwa Molepolole, Mme Monei Rebaone, a re go botlhokwa gore Motswana a itse go ipalela metsi, ka go balwa ditlhaka tse dintsho fela, a bo a tlhalosa gore fa motho a itse go ipalela metsi fa go nna le makgwere o lemoga ka bofefo. 

Mme Rebaone o tlhalositse fa metsi a Botswana a sa ture, a re fa modirisi a dirisa selekanyo sa 5 000 litres ka kgwedi o lopiwa madi a P17.50, mme fa ba feta foo ke gone fa go tsenngwang lekgetho. Bokhutlo