09 Sep 2024

Dikgafela ke tsela nngwe ya go supa maikaelelo a morafe a go tshegetsa ngwao ya one le go gatelela botlhokwa jwa dijo tsa setso segolo jang mabapi le botsogo jo bo siameng.

Ditiro tsa ngwao di tshwana le dikgafela di botlhokwa ka di thusa merafe ka bongwe ka bongwe go ikaya.

Se se builwe ke Kgosi ya Lefhoko, Rre Bikkie Nthomang, yo e neng e le molalediwa wa tlotla kwa moletlong wa dikgafela kwa Maokane Lwetse a tlhola malatsi a marataro. 

Kgosi Nthomang a re mo godimo ga go ipharologanya le merafe e mengwe, meletlo ya ngwao e thusa merafe go tshegetsa ngwao, mme seo se le botlhokwa segolo bogolo mo metlheng eno e ngwao e leng mo diphatseng tsa go nyelela.

A re ka dikgafela e le ipelelo thobo e banni ba a bong ba dikile ba e bone go tswa masimo, go tshegediwa ga tsone go rotloetsa go jewa ga dijo tsa setso, a bolela fa se se le botlhokwa ka dipatlisiso tsa ba botsogo di supa fa dijo tseo di na le boleng jo bo kwa godimo jo bo tlhokiwang ke mmele go ka nna o itekanetse.

Ka jalo, a rotloetsa banni ba Maokane go tseela kwa godimo dijo tse ba di bonang go tswa masimo, a re ba seka ba di lebela kwa tlase mme fa e le sengwe ba latedise metlhale ya go ka di tlhabolola le gone go di phuthela mo go faphegileng go gweba ka tsone go itirela letseno.

Kgosi Nthomang o ne a phophotha legetla banni ba motse oo, a re le ntswa pula e nnile boutsana mo pakeng e e fetileng ya temo ba ne ba seka ba tlhoboga legodimo.

A re go bo ba ne ba itshokela temo le fa seemo se ne se ka kgoba ba le bantsi marapo, ke selo se sentle ka ba kgonne go sela sengwe.

O ba akgoletse kgolo e moletlo wa bone wa dikgafela o e supang ngwaga le ngwaga, a re go tloga fela kwa moletlong wa ntlha go fitlha mo go wa mono ngwaga o e leng wa borataro go tshwarwa.

Kgosi a ba gakolola gore ngwaga o o tlang, ba nne le disupiwa tsa ngwao tse ba ka di bontshang ba-tsena moletlo di akaretsa dijo tsa setso ka go farologana ga mmogo le didirisiwa bogolo jang tse di amanang le temo-thuo.

Kgosi Nthomang a re ba supe gape maungo le dibapalwa-nageng ka mefuta tse di fitlhelwang mo kgaolong ya bone, a tlhalosa fa se, se ka thusa go tlotlomatsa ngwao ya bone le go supa ditso.

A re go ka kgatlha leitho thata gape fa ba ipelela dikgafela ba apere tse di tsamaelanang le ngwao ya bone, a bolela fa kapari e le sengwe se se farologanyang batho go ya ka dingwao tsa bone.

Kgosi Isaac Banyaditse wa Maokane o ne a supa fa moletlo wa dikgafela o aga mowa wa popagano le bongwefela mo morafeng wa gagwe, a re ke ka moo ba sa iponeng tsapa go o tshegetsa le mo mabakeng a a thata a akaretsa thobo e e kwa tlase ka ntlha ya pula e e boutsana.

Kgosi Banyaditse o ne a akgolela balemi ba motse wa gagwe boineelo jwa bone mo temong, a re seo ke sone pinagare ya katlego ya moletlo wa dikgafela tsa Maokane.

O akgotse barotloetsi ba moletlo oo, ebong moepo wa Jwaneng, a supa fa kemo-nokeng ya one e thusitse moletlo oo go itshetlela le go gola ngwaga go ya ngwageng.

Modulasetilo wa komiti ya balemi-barui ya Maokane Rre Terena Mabeo o ne a iteela legofi morafe wa gaabo tshwaragano ya one mo go baakanyetseng moletlo oo.

Rre Mabeo o ne a kopa balemi go simolola gone jaana go baakanyetsa paka e e tlang ya temo, a bo a ba rotloetsa go ikamanya le mananeo a puso a temo-thuo ka a le botlhokwa fa a dirisiwa sentle, le go thusa batho ka bongwe ka bongwe go itirela dijo go koba tlala.

Mabapi le ditshupo tsa temo-thuo tsa kgaolo ya Mabutsane, o ne a supa fa go tshwenya ka banni ba metse mengwe mo kgaolong ba sa di tsenelele, le gore dikomiti tsa balemi-barui tsa metse ka bontsi di phatlaletse go busetsa kwa morago maiteko a go godisa ditshupo tseo.

Ipelelo dikgafela tsa Maokane e ne e okile banni ka dipalo mme karolo ya modiro e e ratwang bobe ke ba le bantsi ya bo e le e go nowang  bojalwa jwa Setswana jo bo neng bo gorositswe ka thulaganyo e e kgatlhang ke dikgotlana tsa motse oo tse tlhano. Bokhutlo