03 Sep 2024

Bogogi jwa kereke ya Healing Saints Apostolic  bo rotloeditswe go tswelela bo godisa bana ba ba nang le boleng jwa go tsoga e nna baeteledipele ba ba eletsegang.

Ke ka moo kereke e leng botlhokwa  mo go ageng setshaba se se nonofileng.  

Mopalamente wa Serowe bokone Rre Baratiwa Mathoothe  o buile se ka matlhatso fa a ne a buisa maloko a Healing Saints Apostolic kwa bokopanong jwa bone jwa ngwaga  le ngwaga kwa Serowe.

A lebogile bogogi jwa kereke eo go bo ba na le bana ba bantsi mo kerekeng.

A re go godisetsa bana mo tumelong go ba fa boikarabelo le bokamoso jo bo siameng ka ba golela mo bokaeding jo bo maleba go na le ngwana yo o golang a sa itse Modimo.   

Mopalamente o supile fa kereke e le botlhokwa mo lefatsheng ka e kgona go aga boitsholo jwa motho.

A re e thusa motho go dira tse dintle. 

O akgotse ba ba boneng go le maleba gore kereke ya bone e nne teng a bo a ba kopa go re ba e godise jaaka gotwe e na le disekete tse supa.

A re lefatshe le le nang le batho ba ba itseng Modimo le nna ka thitibalo, ledula le kagiso, a bo a ba kopa go tswelela ba rapela gore go nne le kagiso mo lefatsheng ka bophara.

Mo kgothatsong Archbishop Tshenolo Pansiri a re bokopano jwa bone ke jwa bone, a kopa gore ba itse gore ga se nako ya go gagautlhana le go supana ka menwana.

O kopile maloko go itse gore a tsile go baakanya le go  godisa kereke a yone ka tsotlhe tse ba di tshwereng.

Archbishop Pansiri o ba lemotshitse gore jaaka moono wa bone wa bokopano jwa ngwaga e le; Lefika La motheo o o nonofileng,  ba tshwanetse go itse gore ke bone motheo o o nonofileng wa Modimo, a tlatsa ka gore modimo o agetse tempele ya gagwe  mo go one.

Archbishop Pansiri  o ile a tswelela a ba bolelela gore mebele ya bone ke tempele ya modimo le gore ba thaetswe mo lefikeng la gore maikaelelo a modimo a diragadiwe.

O ne a ba kopa go godisa tumelo le go gogela ba bangwe mo modimong ka lebaka la gore lefatshe le setse le  tlhakatlhakane mme le tlhoka dithapelo tsa bone gore go rene kagiso. 

A tswelela ka gore ba tshwanetse go itse gore bakeresete ke lesedi le le tlhomilweng mo lefatsheng  gore mang le mang fa a  bona esedi le a bone poloko, mme poloko eo, e mo go bone e le barapedi.

O ne a ba kopa go nna ka boikokobetso fa pele ga Modimo ka e le one o batlang batho ba ba ikokobetsang ka nako tsotlhe, a sa rate maikgogomoso ka gore ke Modimo o o lefufa. Bokhutlo