22 Oct 2014

Banana bangwe ba kgaolo ya Gumare ba itumeletse ditlhopho tsa mono ngwaga fela thata.

Fa ba bua mo potsolotsong bosheng, banana ba supile fa e tla bo e le lantlha ba tlhopha mme e bile ba bona fa ditlhopho tsa mono ngwaga di gaisa tsa 2009 ka ipapatso e le e e kwa godimo fela thata gonne melaetsa e gasiwa mo diromamoweng, dipampiri tsa dikgang le mo thelebisheneng tota.

 Mme Kenalemodisa Samoxha wa dingwaga tse di lesome le boferabongwe a re o sale a eleditse go tlhopha mme fela dingwaga tsa gagwe di ntse di sa mo letle jalo e tla a re ka letsatsi la ditlhopho a bo a ya go diragatsa tshwanelo ya gagwe ka go tlhopha moemedi yo a mmatlang.

Mme Keotshepile Segobodi  ene a re o itumelela fa a tsile go tlhopha monongwaga ka a ne a eleditse go tlhopha ka  2009 mme a sa kgona ka a ne a sa digela dingwaga tse di lesome le boferabobedi.

Bobedi jo bo boletse fa dikarata tsa bone tsa Omang di le mo tirisong mme e bile ba somaretse dikarata tse ba ikwadiseditseng ditlhopho ka tsone.  

Ba tlhalositse fa ba setse ba tlhodile maina a bone mo bukeng ya maina a batlhophi mme ba tlhomamisitse fa a le teng selo se se ba rurifaletsang gore ba tla kgona go tlhopha mono ngwaga.

Ba rotloeditse banana ba bangwe go sa kgobiwe marapo ke mela e meleele ka letsatsi la ditlhopho gonne ba tla a bo ba ya go itlhophela moemedi yo o tla tsisang diphetogo gammogo le go araba matshwenyego a bone a akaretsa a thuto le letlhoko la mebereko.

Mme Bame Gadiresepe ene a re ga a ikwadisa ka e rile nako e go neng go kwadisiwa a bo a ise a  digela dingwaga tse di lesome le boferabobedi mme a ne a eleditse go ikwadisa gore le ene a tle a tlhophe.

A re mo ditlhophong tse di tlang o tsile go ikwadisa ka a tla bo a lekane go tlhopha mme le ene o rotloeditse banana le bagolo go diragatsa tshwanelo ya bone ya go tlhopha.

Mme Madithaga Tsele a re dikgwetlho tse a tleng a kopane le tsone ka nako ya go tlhophiwa ke go ema lebaka le leleele mo meleng mme seo se ka seke se mo kgobe marapo.

Mme Tsele a re go le gantsi o goroga kwa matlhophelong pele fa go bulwa ka nako ya borataro gore a nne mongwe wa ba ntlha go latlhela tlhopho ya gagwe.

Le ene o rotloeditse setshaba ka kakaretso go ya go tlhopha ka letsatsi la ditlhopho ka go le botlhokwa go dira jalo gore motho a tseye seabe mo pusong ya batho ka batho.

Bokhutlo.